Овој викенд, студентите од нашата студиска програма UX/UI и графички дизајн, заедно со студенти од креативните академии од Brainster учествуваа на 48-часовен хакатон. Во оваа ограничена временска рамка, учесниците имаа цел да изработат креативно решение за клиентот САВА Осигурување.
Поделени во девет групи, стотина студенти разменуваа идеи, искуства и експертизи за да стигнат до крајното победничко решение за веб-апликација за кориснички профили.
Настанот го отвори генералната директорка на Сава Осигурување, Мелита Гугуловска, поздравувајќи ги талентите и посакувајќи им успешна работа. Ги потсети студентите дека со овој хакатон добиваат одлична шанса да бидат претставени пред цела групација:
„Гледајте на ова како на личен предизвик и можност за иден раст на кариерата“, рече таа.
Динамична и енергична атмосфера
Деница Стојкоска од тимот „Партнерства“, како некој што постојано ја следи работата на студентите и ги знае сите нивни проекти, изјави дека има целосна доверба во креативците и верува дека одлично ќе се покажат и на овој голем проект.
Нашите простории беа исполнети со динамична и енергична атмосфера, тимска соработка и поддршка помеѓу студентите. Тимовите работеа напорно за остварување на своите идеи и концепти, стекнувајќи се со уникатното искуство да учествуваат во симулација на реална работна атмосфера.
Тамара Трајкова, која е прва година на нашата уникатна студиска програма UX/UI и графички дизајн вели дека овој хакатон ја научил како да работи во тим и да биде тимски играч.
„Сосема е поразлична индивидуалната работа од соработката со колеги коишто те учат на нешто ново. Многу ми се допаѓаше динамичната енергија на хакатонот, притисокот, самиот хаос и тоа што 100% бевме фокусирани на крајната цел“, вели таа.
Нејзиниот колега Марко Станиновски исто така уживаше во тимската работа и работеше на крајната цел – креирање на апликација која ќе донесе најголема вредност на клиентот и корисниците на продуктот.
„Се пријавив на хакатонот зашто сум свесен дека е од огромно значење за мене како студент. Во мојот тим цело време имавме добра комуникација и одлична атмосфера. Изработивме солидно решение во кое многу верувам и се надевам дека ќе победиме“, ни рече Марко.
Клиентите се одушевени од презентациите
Жири-комисијата која во следните неколку дена ќе го избира победничкото решение, од страна на претставниците од САВА Осигурување е составена од генералната директорка Мелита Гугуловска и извршниот директор Кристиан Лешков. Во одлуката ќе им помогнат и инструкторите од академиите Михајло Тунев и Виктор Милевски.
Од САВА Осигурување беа одушевени од презентациите на студентите и од едноставноста на нивните решенија. Сигурни сме дека ќе имаат тешка задача да го одберат победничкото решение. По одлично презентираните решенија за веб-апликација за кориснички профили, генералната директорка Гугуловска изјави:
„Студентите покажаа голем интерес и посветеност, при што за 48 часа успеаа да дадат предлози за креативни, функционални и практични предлози за проектната задача“.
Како компанија ние сме многу сме горди што одлучивме да им дадеме поддршка и можност да работат на реален проект“, рече Гугуловска.
Ова искуство, според неа, не само што ги потикна студентите да развиваат таленти и вештини во решавање на реални предизвици туку и на нив, како компанија им овозможило пристап на нови иновативни решенија.
Лешков, исто така, ја пофали посветеноста на талентите и динамиката на тимовите:
„Премногу интересни решенија, позитивна енергија и посветеност на проблематиката покажаа студентите на овој хакатон. Ентузијазмот и иновативноста што ги демонстрираа студентите се за пофалба и им посакуваме да продолжат понатаму со истата енергија која без сомнение ќе ги доведе до успех и напредок во нивните кариeри“.
Поддршка од менторите низ целиот процес
Во текот на хакатонот, студентите беа посетувани од своите ментори пред кои ја споделуваа својата досегашна работа и добиваа совети за подобра егзекуција на тимското решение.
После една од менторските сесии, инструкторот Златан Мујчин ни сподели дека, како и секогаш, е импресиониран од креативноста и интелигенцијата на студентите и од нивната снаодливиост, дури и кога немааат доволно информации. Тој потенцира дека хакатонот е супер за студентите бидејќи ретко кој има можност да работи на ваков проект за дигитализација. Особено за компании кои до пред некоја година се сметаа дека немаат никаква потреба од ИТ-сервиси.
Хакатоните се одржуваат со цел студентите да увидат како е да се работи под притисок, во динамична работна средина и во ограничен рок. Исто така, овие настани се идеална можност студентите да ги збогатат своите портфолија со реални проекти за големи и признаени компании.
За две недели, на победничкото решение ќе продолжат да работат студентите од техничките академии на Brainster, како и студентите од нашата студиска програма Софтверско инженерство и иновации.
